Nú nýverið var brotist inn í Staðarhólskirkju í Saurbæ í Dalabyggð.
Þetta kom fram á Facebook síðu Ragnheiðar Pálsdóttur bónda í Hvítadal í Saurbæ en hún er einn sóknarnefndarmanna og staðarhaldara Staðarhólskirkju í Saurbæ.
Ekki er vitað hverjir brutust inn í kirkjuna en þeir sem þarna voru á ferð hafa greinilega gramsað í flest öllu sem hægt var, og sóðað út gólfteppið í kirkjunni að sögn Ragnheiðar.
Dyrnar á kirkjunni voru skildar eftir opnar eftir innbrotið og blöktu þær í rokinu þannig að klæðning kirkjunnar fékk að finna fyrir því eins og Ragnheiður orðar það sjálf.
Á Facebook síðu Hugrúnar Reynisdóttur bónda á Kjarlaksvöllum í Saurbæ kemur fram að hún telji líklegt að þeir sem hafi brotist inn í kirkjuna hafi borðað þar, sofið, kveikt á kertum, spilað á orgelið og líklega vaskað upp uppúr skírnarskálinni.
Fólk í sveitinni og víðar er sammála um það að hér sé um mjög dapurlegan atburð að ræða og ótrúlegt hversu lágt fólk sem gerir slíka hluti geti lagst.
Þá er óskað eftir því að ef einhverjir hafi orðið varir við grunsamlegar mannaferðir við kirkjuna eða geti gefið einhverjar upplýsingar um málið setji sig í samband við Lögregluna í Borgarfirði og Dölum í síma 444 0300.
Hér fyrir neðan má sjá ljósmyndir sem Ragheiður Pálsdóttir tók af ummerkjum eftir innbrotsaðilana.
